“ಕರ್ನಾಟಕದ ಪಾರಂಪರ್ಯ ವೈಭವ — ಇತಿಹಾಸ, ಸಂಸ್ಕೃತಿ ಮತ್ತು ಪ್ರಕೃತಿಯ ಸಮನ್ವಯ”
ಭಾರತದ ದಕ್ಷಿಣ ಭಾಗದಲ್ಲಿ ನೆಲೆಗೊಂಡಿರುವ ಕರ್ನಾಟಕ ರಾಜ್ಯವು ಐತಿಹಾಸಿಕ, ಸಾಂಸ್ಕೃತಿಕ ಹಾಗೂ ಪ್ರಾಕೃತಿಕ ಸಂಪತ್ತಿನ ಅಪಾರ ಭಂಡಾರವಾಗಿದೆ. ಇಲ್ಲಿ ಪ್ರತಿಯೊಂದು ಕಲ್ಲು, ಪ್ರತಿಯೊಂದು ಸ್ಮಾರಕವೂ ಒಂದು ಕಥೆಯನ್ನು ಹೇಳುತ್ತದೆ; ಪ್ರತಿಯೊಂದು ಬೆಟ್ಟ, ಕಾಡು ಮತ್ತು ನದಿ ಜೀವ ವೈವಿಧ್ಯದ ಅದ್ಭುತವನ್ನು ಅನಾವರಣಗೊಳಿಸುತ್ತದೆ.
ಪ್ರಾಚೀನ ಕಲಾಸೃಷ್ಟಿಗಳಲ್ಲಿ ಹಂಪಿ ಒಂದು ವಿಶ್ವಪ್ರಸಿದ್ಧ ಪಾರಂಪರಿಕ ತಾಣವಾಗಿದೆ. ವಿಜಯನಗರ ಸಾಮ್ರಾಜ್ಯದ ವೈಭವವನ್ನು ಹೊತ್ತು ನಿಂತಿರುವ ಈ ಪ್ರದೇಶದ ಅವಶೇಷಗಳು, ಕಲ್ಲಿನ ರಥ, ವಿಶಾಲ ಮಂದಿರಗಳು, ಸಂಗೀತ ಸ್ತಂಭಗಳು—ಎಲ್ಲವು ನಮ್ಮ ಪೂರ್ವಜರ ಕಲಾತ್ಮಕ ನೈಪುಣ್ಯಕ್ಕೆ ಸಾಕ್ಷಿಯಾಗಿದೆ.
ಇದೇ ರೀತಿ ಬಾದಾಮಿಯ ಗುಹಾ ದೇವಾಲಯಗಳು, ಐಹೊಳೆಯ ಶಿಲ್ಪಕಲೆ, ಪಟ್ಟದಕಲ್ಲು ವಿಶ್ವ ಪಾರಂಪರಿಕ ಸ್ಮಾರಕಗಳು ಹಾಗೂ ಬೇಲೂರು ಮತ್ತು ಹಳೆಬೀಡುಯ ಹೊಯ್ಸಳ ವಾಸ್ತುಶಿಲ್ಪ ಪ್ರತಿಯೊಂದು ಕರ್ನಾಟಕದ ಇತಿಹಾಸವನ್ನು ಕಂಗೊಳಿಸುವ ಅಮೂಲ್ಯ ನಿಧಿಗಳಾಗಿವೆ.
ಇತಿಹಾಸ ಮಾತ್ರವಲ್ಲ, ಪ್ರಕೃತಿಯಲ್ಲಿಯೂ ಕರ್ನಾಟಕ ತನ್ನದೇ ಆದ ವಿಶೇಷತೆ ಹೊಂದಿದೆ. ಪಶ್ಚಿಮ ಘಟ್ಟಗಳು ಎಂಬ ವಿಶ್ವ ಜೀವ ವೈವಿಧ್ಯ ತಾಣವು ರಾಜ್ಯದ ಪಶ್ಚಿಮ ಭಾಗದಲ್ಲಿ ಹರಡಿಕೊಂಡಿದ್ದು, ಅನೇಕ ಅಪರೂಪದ ಸಸ್ಯ-ಜೀವಿಗಳಿಗೆ ಆಶ್ರಯವಾಗಿದೆ. ಇಲ್ಲಿನ ಹಸಿರು ಕಾಡುಗಳು, ಜಲಪಾತಗಳು ಮತ್ತು ಮಳೆಯ ಸಿರಿವಂತಿಕೆ ಪ್ರಕೃತಿ ಪ್ರಿಯರ ಮನಸನ್ನು ಸೆಳೆಯುತ್ತದೆ. ಇದು ಕೇವಲ ಸೌಂದರ್ಯದ ತಾಣವಷ್ಟೇ ಅಲ್ಲ, ಪರಿಸರ ಸಮತೋಲನದ ಜೀವನಾಡಿಯೂ ಆಗಿದೆ.
ಈ ಪಾರಂಪರಿಕ ಹಾಗೂ ಪ್ರಾಕೃತಿಕ ತಾಣಗಳಿಗೆ ಭೇಟಿ ನೀಡುವುದು ಕೇವಲ ಪ್ರವಾಸವಲ್ಲ; ಅದು ನಮ್ಮ ಇತಿಹಾಸವನ್ನು ಅರಿಯುವ ಪ್ರಯಾಣ, ನಮ್ಮ ಸಂಸ್ಕೃತಿಯನ್ನು ಅನುಭವಿಸುವ ಅವಕಾಶ. ಪ್ರತಿಯೊಬ್ಬರೂ ತಮ್ಮ ಸುತ್ತಲಿನ ಪಾರಂಪರಿಕ ತಾಣಗಳಿಗೆ ಭೇಟಿ ನೀಡಿ, ಅವುಗಳ ಮಹತ್ವವನ್ನುತಿಳಿದುಕೊಳ್ಳಬೇಕು. ಇವು ನಮ್ಮ ಮೂಲಭೂತ ಕರ್ತವ್ಯ, ನಮ್ಮ ಗೌರವ ಮತ್ತು ನಮ್ಮ ಭವಿಷ್ಯದ ಹೆಮ್ಮೆಯ ಅಡಿಗಲ್ಲುಗಳು.
ಪ್ರತಿ ವರ್ಷ ಆಚರಿಸುವ ವಿಶ್ವ ಪಾರಂಪರಿಕ ದಿನ ನಮ್ಮಿಗೆ ಈ ಜವಾಬ್ದಾರಿಯನ್ನು ನೆನಪಿಸುತ್ತದೆ. ಈ ದಿನವು ಕೇವಲ ಆಚರಣೆಯಲ್ಲ, ನಮ್ಮ ಪಾರಂಪರ್ಯವನ್ನು ಕಾಪಾಡುವ ಸಂಕಲ್ಪದ ದಿನವಾಗಬೇಕು. ಹಳೆಯ ಸ್ಮಾರಕಗಳನ್ನು ಸಂರಕ್ಷಿಸುವುದು, ಅವುಗಳನ್ನು ಹಾನಿಗೊಳಿಸದೇ ಉಳಿಸುವುದು ಮತ್ತು ಮುಂದಿನ ಪೀಳಿಗೆಗೆ ಅದರ ಮಹತ್ವವನ್ನು ತಿಳಿಸುವುದು ನಮ್ಮ ಕರ್ತವ್ಯವಾಗಿದೆ.
“ಪಾರಂಪರ್ಯವನ್ನು ಕಾಪಾಡುವುದು ಎಂದರೆ ಭೂತಕಾಲವನ್ನು ಉಳಿಸುವುದಷ್ಟೇ ಅಲ್ಲ, ಭವಿಷ್ಯವನ್ನು ಬಲಪಡಿಸುವುದಾಗಿದೆ.”
ಆದುದರಿಂದ, ನಾವು ಎಲ್ಲರೂ ನಮ್ಮ ಸುತ್ತಲಿನ ಪಾರಂಪರಿಕ ತಾಣಗಳನ್ನು ಕೇವಲ ನೋಡುವುದಲ್ಲ, ಅವುಗಳ ಬಗ್ಗೆ ಗೌರವದಿಂದ ವರ್ತಿಸಿ, ಸಂರಕ್ಷಣೆಗಾಗಿ ಕೈಜೋಡಿಸೋಣ. ಕರ್ನಾಟಕದ ಈ ವೈಭವವನ್ನು ಮುಂದಿನ ತಲೆಮಾರಿಗೆ ಉಳಿಸಿ ಕೊಡುವುದು ನಮ್ಮ ಸಮೂಹ ಜವಾಬ್ದಾರಿಯಾಗಿದೆ.
ಲೇಖನ -ಆಂಜನೇಯ ಮಟ್ಟೂರು
ಶಿಕ್ಷಕರು. ಗಂಗಾವತಿ
